Tangata

Fundado no 1988, Tangata orienta o seu repertorio polas diversas formas coas que se apresenta o tango na actualidade; desde as máis clásicas e coñecidas das que Carlos Gardel ou Osvaldo Pugliese serían principais expoñentes, ate as máis modernas das que Astor Piazzola pode ser o máis coñecido referente. Ten participado en importantes festivais musicais e certames de tango de proxeción internacional, constituíndose deste xeito na representación galega do tango. Tangata editou no 1998 o seu primeiro disco Como en outubro , e no 2001 o segundo Trece . No ano 2008 publican un novo traballo: Calambre.

O tango, pola súa orixe, é ponte entre culturas (Europa, África e América). Neste espectáculo conflúen ademais, a formación clásica dos membros de Tangata e o latexo profundamente popular do estilo. O grupo fai uso da música instrumental pura para expresar o máis esencial dun sentir e viver riopratenses xa centenarios. Punto de encontro entre emoción e intelixencia, entre pasado e vangarda, a mensaxe do tango instrumental é quen de chegar con éxito a todos os públicos. O corpo central do espectáculo estará formado polos temas do novo disco, sen renunciar a obras anteriores moi queridas do noso público.

Compoñentes: Artigas Anelo (Montevideo): bandoneón, Alberto Vilas (Redondela): piano, Laura Quintillán (Montevideo): violín, Gustavo Barcia (Vigo): contrabaixo